परीक्षा नियन्त्रण कार्यालय सानोठिमीले एसएलसी परीक्षाको नतिजा आज सार्वजानिक गरेको छ । एसएलसी परीक्षा २०६५ मा २ लाख ५६ हजार ७ सय ७९ विद्यार्थी उत्तीर्ण भएका छन् । यो ६८.७४ प्रतिशत हो । जसमध्ये नियमिततर्फ उत्तीर्ण हुनेमा २ लाख ५६ हजार ७ सय ७९ जना छन्। परीक्षामा ४ लाख १२ हजार ३ सय २१ जनाले फाराम भरेकामा ३ लाख ८८ हजार ५ सय २२ जना परीक्षार्थी सामेल थिए ।

परीक्षा प्रकाशन समितिको बैठकले ५ नम्बर ग्रेस दिने निर्णय गरेको थियो। जसअनुसार नियमित ६८.७४ प्रतिशत पास हुन सकेका हुन भने एक्जाम्टेडतर्फ ४७ प्रतिशत पास भएका हुन। ग्रेस नदिइएको भए नियमिततर्फ ६४ प्रतिशत मात्र पास हुन्थे। वि.सं. १९९० मा पहिलो पटक नेपालबाटै एसएलसीको परीक्षा दिने व्यवस्था सुरु भएको हो । त्यसअघि भारतबाट मात्र यो परीक्षा दिन पाइन्थ्यो । त्यसैगरी २०६३ देखि १० कक्षाको कितापबाट मात्र प्रश्न सोध्न थालिएको हो । त्यसअघि ९ र १० कक्षाको पाठ्यपुस्तकबाट प्रश्न सोधिन्थ्यो । सबैभन्दा पहिले अर्थात् पहिलो एसएलसी परीक्षामा पुष्पभक्त मल्ल बोर्डफस्ट भएका थिए । हालका माओवादी नेता बाबुराम भट्टराई २०२६ सालको एसएलसी परीक्षामा बोर्डफस्ट भएका थिए ।

एसएलसीको इतिहासमै सबैभन्दा बढी प्रतिशत यसअघिको अर्थात् वि.सं. २०६४ को ब्याजमा पास भएका थिए । जसमा ६३.६३ प्रतिशत परीक्षार्थी उत्तीर्ण हुन सकेका थिए । केही वर्षअघिदेखि सुरु भएको अपाङ्गका लागि अरुभन्दा डेढ घन्टा बढी समय यस पटक पनि उपलब्ध गराइएको थियो । एसएलसीकै इतिहासमा पहिलो पटक विदेशी परीक्षार्थीले पनि जाँच दिएकी थिइन । कोरियाली परीक्षार्थी रिमसोहे नेपालबाट एसएलसी दिने पहिलो विदेशी बन्न सफल भएकी थिइन ।यो परीक्षामा २५ परीक्षार्थी बराबर एक निरीक्षक व्यवस्था गरिएको थियो । त्यसैगरी सबैभन्दा बढी परीक्षार्थी काठमाडौंमा ४७ हजार ४ सय ९० जना थिए भने सबैभन्दा कम मनाङमा ५६ जना सामेल थिए । १ हजार ४ सय ५ परीक्षा केन्द्रमार्फत् ती परीक्षार्थीले परीक्षा दिएका थिए ।