परराष्ट्रमन्त्री सुजाता कोइरालाले अहिलेको सरकार नयाँ संविधान नबनेसम्म नढल्ने दावी गर्नु भएको छ । उहाँले यो सरकार ढलेमा देश फेरि गृहयुद्धतर्फ धकेलिने बताउनुभयो ।
नेपाली काङ्गे्रसको भ्रातृ सङ्गठन दलित सङ्घको केन्द्रीय अधिवेशनमा सहभागी हुन चितवन आउनुभएकी मन्त्री कोइरालाले आज स्थानीय सञ्चारकर्मीसँग संक्षिप्त प्रतिक्रिया दिँदै सो कुरा बताउनुभएको हो । मन्त्री कोइरालाले अहिले दलहरुबीच सहमति र सहकार्यको विकल्प नभएको समेत बताउनुभयो । माओवादीलाई पनि सरकारमा सहभागी गराउनुपर्ने बताउँदै उहाँले लोकतन्त्रको उपलब्धि जोगाउनुपर्नेमा जोड दिनुभयो ।
सेना समायोजनका विषयमा प्रधानमन्त्री नेपालले दिनुभएको अभिव्याक्तिप्रति आफूले कुनै टिप्पणी नगर्ने समेत उहाँले बताउनुभयो । उहाँसागै आउनुभएका सिँचाइ मन्त्री बालकृष्ण खाँणले प्रधानमन्त्रीको भनाबारे मन्त्री परिषद्मा कुनै जानकारी नभएको बताउनुभयो ।उहाँले सेना समायोजन सहमतिबाटै टुङ्ग्याउनुपर्ने बताउँदै यसका लागि काङ्ग्रसले अगुवाई गर्ने जिकीर गर्नुभयो ।तीन दिनसम्म चल्ने दलित सङ्घको केन्द्रीय अधिवेशनमा नयाँ संविधानमा दलित मुद्दाका लागि पार्टीको भूमिका, पार्टीभित्रै दलित मुद्दालगायतका विषयमा छलफल हुनेछ । अधिवेशनले नयाँ नेतृत्व पनि चयन गर्नेछ ।
ऐत राज तुम्रोक
