पार्श्व गायनमा अहिले गायिका पुष्पा पौडेलको माग दिनानुदिन बढ्दै गइरहेको छ । ०५८ देखि गुरुदेब कामतसँग गायन प्रशिक्षण लिएर गायनमा होमीएकी पुष्पाको फिल्ममा गीत गाउने रहर बालापनदेखि नै थियो रे ।

 

भनिन्, “फिल्म हेर्दा सीनमा भन्दा बढी मेरो ध्यान गीतमै अड्कन्थ्यो ।  यो गीतमा मेरो आवाज भए कस्तो हुन्थ्यो होला भनेर कल्पन्थें ।” रोमाञ्चीत हुँदै पुष्पा बोलीन्,”अहिले त्यो सपना पूरा हुदैगइरहेको छ । तर मैले गर्न धेरै बांकी छ । यो त सुरुवात मात्रै हो ।”

 

अहिलेसम्म झण्डै ६५ वटा नेपाली फिल्ममा आफ्नो आवाज दिइसके तापनि उनी आफैले निकालेको एल्बम साथ को सानी सानी….बोलको गीतबाट मात्रै “पुष्पा भन्ने पनि गायिका छ है” भनेर श्रोता माझ चिनीन थालेको बताउदै पुष्पाले भनिन्,”मैले धेरै फिल्ममा गाएँ । तर म पढाइमा नै धेरै ब्यस्त भएका कारण मिडीयामा छाउन सकिनँ । आफै एल्बम निकालें,त्यो एल्बमले भने मेरो चर्चा हुन थालेछ ।”

 

 पुष्पाले पहिलोपटक फिल्मका लागि भनेर गाएको गीतको बोल थियो- मेरो जवानी साह्रै बेइमानी…। संजय कुटु निर्माता रहेको त्यो फिल्म अहिलेसम्म पनि बनेको छैन । तर, भुवन केसी निर्मीत म तिमी बिना मरिहाल्छु को नौनी नौनी नौनी… बोलको गीतले भने उनलाई फिल्मी गायनमा चर्चामा ल्याइदियो । भन्छिन्, “मैले बारुद मा आँखामा आँखा जुधाइ… गीत पनि गाएको थिएँ । आफैलाई निकै राम्रो लागेको थियो । तर, गीतको चर्चा नै भएन । तर, नौनी नौनी… भने राम्रो चल्दैछ ।” उनले पहिला प्राय आइटम गीत गाइन् । त्यसकारण उनलाई मेलोडीयसभन्दा आइटम गीत गाउनमै बढी अफर आउन थाल्यो । भनिन् “तर मलाई मेलोडीयस गीत गाउन बढी मन लाग्छ । छाडी गए पाप लाग्ला मा मैले निदाउ म सपनीमा आउला… बोलको मेलोडीयस गीत गाएकी छु, बहुत राम्रो छ । मलाई लाग्छ, त्यो गीत बजारमा आएपछि मलाई मेलोडीयस् गीत गाउने अबसर अझै मिल्छ कि ?”

 

राष्ट्रिय, आधुनीक तथा फिल्मका गरी अहिलेसम्म ३०० भन्दा बढी गीत गाइसकेकी पुष्पालाई फिल्मी गायनमा संगीतकार सुरेश अधिकारी, शम्भुजीत बाँस्कोटा, महेश खड्का तथा चेतन सापकोटाले ठूलो साथ दिएको बताउँछिन् । दिनमा तीनवटासम्म गीत रेकर्ड गर्ने लगन जुरे तापनि “स्वर बिग्रिएर गीत स्तरिय बन्दैन की भनेर दुइटासम्म मात्र रेकर्ड गरेकी छु” भन्ने पुष्पालाई अरू भन्दा फिल्मी गायनमै जम्ने इच्छा छ रे । किन होला ?

 

 तनहुँ,खैरेनीटारको श्रीराम चलचित्र मन्दिरको मालीककी छोरी पुष्पालाई सानैदेखि आफ्नै हलमा हेरेका फिल्मको छाप परेको पनि हुन सक्छ । तर, उनी यही कारणले फिल्मी गायनमा लागेको भने मान्दिनन । भन्छिन्, “यही कारणले नै त होइन तर, केही छाप भने परेको हुनसक्छ ।”

 

सानैदेखि स्कुलका कार्यक्रममा गीत गाउन कस्सिहाल्ने पुष्पा दीपक लिम्बू, जगदिश समाल, सत्य-स्वरुप आचार्यको स्वर मन पराउछिन् । नेपाली तारामा भाग लिएर सातौ स्थानमा परिरहेको बेलामा एक्कासी पिनास भएर नगाइकन निस्कनु पर्दा उनको मन अमिलो भएछ । “त्यो पीडा गीतै लागेर सान्त पर्ने कोशीस गरिरहेकी छु ।”

 

 पुष्पा भन्छिन् । जिन्दगीको सपना के रै छ त पुष्पाको – भनिन्, “अहिलेको पहिलो सपना भनेको जसरी हुन्छ डिस्टीङ्सन मार्क्स ल्याएर एमबीए सिद्धयाउने । अनि गायनमा पूरा दिमाग कन्सन्ट्रेट गर्ने । यता भएन भने सामाजीक क्षेत्रतिर लाग्ने । राम्रै भयो भने गायनमै जम्ने ।”